MERKEZÊ XABERAN – Festîvala Fîlman a Rojava ya 6ine, bi vîrardişê kesê ke qirkerdişê Sînema Amûdî de dinyaya xo bedelna, dest pêkerd.

 

Festîvala Fîlman a Mîyanneteweyî ya Rojavayî ke emser bajarê Qamişloyî yê Vakur û Rojhelatê Sûrîye de reya 6ine yeno organîzekerdiş, dest pêkerd.

 

Festîvala ke bi sloganê "Hîkayeyê Hempar, Sînemaya Azad" yena organîzekerdiş, bi vîrardişê 283 tutan ê ke serra 1960ine de semedê paştdayîşê şarê Cezayîrî dir şîbî sînemaya Amûdî û şewatê sînema de dinyaya xo bedelnabî, dest pêkerd. Pêwa keyeyanê kesê ke qirkerdiş de dinyaya xo bedelnaye, xeylêk kesî tewrê vîrardişî bîyî. Hemserekê Komîna Fîlman a Rojava Şîrîn Yûsif qisey kerd.

 

Ferhat Merde û Mamoste Beşîr Melenava semedê vîrardişê kesê ke dinyaya xo bedelnaye şiirêk wend. Kesê ke qirkerdiş ra xelas bîyî Mihemed Emîn Ebdulselam û Îbrahîm Rustem şahidîyê xo vatî.

 

Vîrardiş bi deyîran peynî bî.