Mîdye Miqted

 

HELEB - Abdullah Ocalan di nameya xwe ya ji bo civaka êzidiyan şandî de wiha got: “Ev pêvajo herî zêde dê ji bo gelê me yê êzidî Ronesans be.” Derbarê namyê de Endama Yekîtiya Êzidiyên Sûriyê Suad Hiso, axivî û got: "Îro jî li ser esasê peyama rêbertî em xwe ji nû ve diparêzin û xwe bi rêxistin dikin. Bi îradeya xwe ya xurt a ku teslîmkariyê napejirîne dan îsbat kirin."

 

Rêberê Gelê Kurd Abdullah Ocalan ji bo civaka êzidiyan nameyek şand. Abdullah Ocalan, di nameyê de got: “Ez dixwazim bibêjim; ez di her şert û mercî de têkoşîna wan destek dikim. Azadiya êzidiyan û azadiya gelên Rojhilata Navîn bi hev ve girêdayî ye. Di vê çarçoveyê de, Banga Aştî û Civaka Demokratîk bersiva li dijî 73 fermanên êzidiyan e. Pêvajoya ku me daye destpêkirin herî zêde wê hebûn û azadiya êzidiyan pêk bîne. Ev bang Ronesans e û herî zêde jî wê ji bo gelê me yê êzidî Ronesans be. Ev pêvajo wê bi hest û têkoşîna hevpar bi ser bikeve. Ez dubare silavên xwe yên bêdawî dişînim.”

 

Derbarê peyamê de endama Yekîtiya Êzidiyên Sûriyê Suad Hiso ji ajansa me JINNEWS'ê re axivî û bal kişand ser girîngiya peyamê û bandora peyamê ya li ser civaka êzidiyan. 

 

Peyama sala 2013'yan a ji bo êzidiyan

 

Suad Hiso, diyar kir ku di serî de peyama Rêberê Gelê Kurd Abdullah Ocalan bi coş pêşwaz kirine û wiha dest bi axaftina xwe kir. "Em weke civaka êzidî bi peyama rêbertî gelek kêfxweş bûn. Ji ber ku rêbertî êşa êzidiyan hîs dike û bi pirsgirêka wan re mijûl dibe. Gelek car ji civaka êzidî re peyam rêdikir. Di sala 2013'yan de dîsa peyam ji civaka êzidî re rêkir. Têde bang kir ku divê civaka êzidî were parastin ji ber ku rewşa wan niha di nava metirsiyê de ye."

 

Li hemberî êzidiyan xiyaneta mezin

 

Suad Hiso, di dewama axaftina xwe de bal kişand ser êrişên li hember civaka êzîdî û wiha bi lêv kir: "Di sala 2014'an de çeteyên herî tund di cîhanê de ku bi navê DAIŞ tên nasîn bi ser civaka êzidî li Şengalê de çûn. Gelek komkujî pêk anîn. Gelek jin û zarok hatin qetil kirin, hatin revandin di bazaran de hatin firotin. Em destpêkirina van fermanan di nava civaka kurd de bi navê îxaneta mezin bi nav dikin. Ji ber ku 12 hezar pêşmergeyên ku aliyek kurdî ne jî dest ji Şengal û parastina Şengalê berdan. Xwestin bi vê awayî civaka êzidî qir bikin. Rêbertî jî di peyama xwe ya dawî de vê yekê tekez dike ku civaka êzidî heya roja me ya îro karîbûn parastina xwe ji fermanên dîtir bikin."

 

Xwe bi rêxistin kir û xwe bi dinyayê dan nasîn

 

Suad Hiso, diyar kir ku niha êzidî parastina xwe bi xwe dikin û wiha got: "Piştî ewqas ferman bi ser serê civaka êzidî de hat, niha civaka êzidî parastina xwe dike. Xwe ji nû ve bi rêxistin dikin. Meclis û hêzên xwe ava kirine. Êdî baweriya xwe bi xwe tînin. Ji ber ku yên xwedî li civaka Şengalê derketin YPG, YPJ, HPG, YJA-STAR bû, civaka êzidî ji qirkirinê xelas kirin. Bi vê awayî civaka êzidî karîbûn xwe bi dunyayê bidin nasîn."

 

Duh êzidî îro elewî... 

 

Têkildarî rewş û aloziya ku îro Sûriya tê re derbas dibe û ev hewldana qirkirinên etnîkî tên kirin Suad Hiso wiha nêrînên xwe anî ziman: "Ev demeke ku li beravên Sûrî (Sahilê) gelek komkujî li hemberî elewiyan tê kirin. Jin, zarok, mêr, pîr û ixtiyar bi howane tên kuştin. Em qetilamên ku niha li beravê dibin vedigerînin dîroka 2014`an ku dema bi destê DAIŞ`ê civaka êzidî bi heman reng û hovîtiyê hatin qetil kirin. Her wiha di 2016`an de li Kobanê û 2018`an de li Efrînê bi heman dest û zihniyetê ev kiryar hatin meşandin. Lê di roja me ya îro de em weke civaka êzidî bi her awayî parastina ol û çanda xwe dikin." 

 

'Bi peyama rêbertî têkoşîn nû bû'

 

Suad Hiso, derbarê peyama ku Abdullah Ocalan ji civaka êzidî re rêkir de wiha got: "Rêbertî di 18`ê Adarê de di roja ku em ji warê xwe ji Efrînê koçber bûn, peyam ji bo me rêkir me gelek coş ji peyama rêbertî girt. Îro jî li ser esasê peyama rêbertî em xwe ji nû ve diparêzin û xwe bi rêxistin dikin. Di hemû milan de wek YPŞ,YJŞ û asayişa xwe. Bi vê awayî îradeya xwe ya xurt a ku teslîmkariyê napejirîne dan îsbat kirin."

 

'Em bi hêvîne ku em ê serokê xwe bibînin'

 

Bi hevoka ku divê her netewek bikaribe xwe ji bişaftin û qirkirinê rizgar bike divê xwe bi rêxistin bike bi vê hevokê Suad Hiso axaftina xwe wiha berdewam kir: "Li Şengalê êzidî ji ber ku xwe li ser fikir û ramanên rêbertî xwe perwerde kirin, dikarin parastina xwe bikin û hebûna xwe heya roja îro berdewam bikin. Divê her netewek xwe biparêze, rêxistinbûna xwe divê ava bike. Di ola êzdiyatiyê de tê gotin ku 'Em xwediyê vê axê ne, lê her netewek cuda gefên xwe li me dane'. Ez carek din silav û hezkirinên xwe ji rêberê Gelê Kurd Abdullah Ocalan dişînim. Em bi hêvîne ku em rêberê xwe fîzîkî di nava xwe de bibînin her wiha em vegerin cih û warê xwe."