ÎZMÎR - Nê prosesê ver bi weçînayîşan de 6 endamê Meclîsê Cinîyan ê HDPyî û endamê TJAyî ameyî tepiştiş. Cinîyan dîyar kerd ke no hewldayîşê krîmînalîzekerdişê TJA û HDPyî yo û vatî, têkoşînê cinîyan îqtîdar tersneno.

 

Îzmîr de 22yê Adare de saetê sibayî de eştî serê hîn keyeyan û mîyan de Endama MYKyê HDPyî Îdîl Ugurlu, Newroz Çelîk a HDPyî, Selma Demîr, Berfîn Çîçek, Hayat Îzgî û Verfeka Însiyatîfê Dayikanê Aştiye Behiye Yalçin ameyî destbendkerdiş û bi bahaneyê xebatê TJA û kovara Jîneolojî 24ê Adare de ameyî tepiştiş.

 

Wazenê krîmînalîze bikerê

 

Hemsereka HDPyî ya Îzmîrî Berna Çelîk da zanayîş ke tepiştişê 6 cinîyan bi amancê şikinayîşê îradeyê cinîye yo û hêrişêk hemverê têkoşînê azadîya cinîye yo. Bernaye dîyar kerd ke HDP partîya hîrên ê pîlî yê Tirkîya yo û vat: “No konseptêk hêrîşê ke HDP û TJAyî krîmînalîze keno yo. TJA tena agêrayîşê cinîyanê kurdan nîyo, cinîyê tirkî zî ci de ca gênê. Bi serran o hemverê TJAyî de hêrişêk yeno kerdiş. Hêriş vernîya weçînayîşî pê ame. Ma meclîsê cinîyan ê  HDPyî awanbîyayîşêkê nuqteyêk temsîlkarîya seyyewbînî paweno de yê. Nê hêrişê hemverê ma seba îradekerdişê cinîyan o. Xeylêk embazê ma yê têkoşîn kenê ameyî qetilkerdiş. Ma do têkoşînê xo her tim bikerê.”

 

Pratîkê helwestê hemverê 6284î tepiştişê cinîyan o

 

Tevgerê Cinîyan ê Sosyalîstan ra Ezgî Ozen zî dîyar kerd ke hêrîşî bi pêroyî hemverê cinîyan û bi taybetî zî hemverê cinîyanê kurdan pê ameyo û wina vat: Wazenê sîyaset de vernîya cinîyan padê û vernîya têkoşînê cinîyan padê. Partîya Yenîden Refah helwestê hemverê qanûnê 6284 mojnayî. Dimayê nê cinî ameyî tepiştiş. La ma cinî têhet de yê. Ma kîşte embazanê xo yê tepişteyan de yê. Ma do têkoşînê xo dewam bikerê.

 

‘Cinîyan ra tersenê’

 

Meclîsê Cinîyan ê KESKî Dîlek Kanlibaş zî wina vat: “Îqtîdar têkoşînê cinîyan ra terseno. Seba nê zî hewl dano vernîya cinîyan pado û cinîyan kêm bikero û  xebatê înan asteng bikero. Hêrişê hemverê cinîyan zî tersê înan mojneno. Vernîya weçînayîşî nê hêrişî hemverê tevgerê cinîyan de ameyo kerdiş. Ma do hîn zêde bibê û têkoşîn bikerê. Ma kîşte embazanê xo de yê.”

 

‘Şima bitersê’

 

Paştdayîşê Morî ra Sîbel Orkmez zî dîyar kerd ke pêwa pêro teda û hêrişan, cinî raşteyan de têkoşîn kenê û wina vat: “Cinîyê ameyî tepiştiş, cinîyê ke têkoşîn kenê. Bi zanebîyayîş nê hêrişî kerdî û waştî  têkoşînê cinîyan krîmînalîze bikerê. La çi kenê wa bikerê do cinîyan mîyanê çar dêsan de heps nêkerê. Wa ê cinîyan ra bitersê.”