MERKEZÊ XEBERAN - Şarê kurdî 4ê Nîsana ke Rojbîyayîşê Rayberê PKKyî Abdullah Ocalanî yo bi nameyê "Raywanîya ver bi Rojî" ver bi dewa ke ci de ameyo dinya rayîr ra şîyayîş organîze keno û 18 serrî pêwa qedexeyan her serre yeno kerdiş.

 

Şarê kurdî têkoşînê azadî de adetêk newe zêde kerdî. Her serre 4ê Nîsane de bi nameyê "Raywanîya ver bi Rojî" ke 18 serrî yo ver bi Amara rayîr ra şinê. Kurd û dostê kurdan emser seba 74ne rojbîyayîşê Abdullah Ocalanî do biherikîyê  Amara.

 

Pîrozbayîyê "Raywînay ver bi Rojî" yewin rey 2004ine de dest pêkerd û emser 18ine pê yeno. Ma seruwenê ke 18 serrî verê ameyo destpêkerdiş, biewnê.

 

2004: Pîrozbayîya yewine

 

2004ine de Federasyonê Komeleyê Paştdayîşê Keyeyê tepişteyan (TUHAD-FED) yê bi KHKyî ame padayîş, rayîr ra şîyayîş organîze kerd û her çar hetê Kurdistan û Tirkîya de bi hezaran kesî tewr bî. Leşker û polîsan dekewtişê dewe de vernî girewtî. Şarî qerarê xo mojna û  barîkat derbaz kerdî. Polîsan bi gaz hêriş kerd. Xeylêk kesî birîndar bî. Pêwa her çî şar xo resna dewe û rojbîyayîş pîroz kerd.

 

2005: Rojbîyayîşê to pîroz bo

 

2005ine de tewrbîyayîşê şarî zêdeyêr bî. No rayîr ra şîyayîş ame astengkerdiş. Nêzdîyê dinga Karataşî de rayîr ame padayîş. Bi des hezaran kesî şîyayîş de bi israr bî. Şarê ke hêrişan de dekewtî serê giran, nuşteyê "Rojbîyayîşê to pîroz bo" nuştî û rojbîyayîşê Rayberê PKKyî Abdullah Ocalanî pîroz kerdî.

 

2006: Qeraxê Firatî de pîrozbayî

 

Seba serewedaritişê 28ê Adare a serrî zî rayîr ra şîyayîş zî ame astengkerdiş.. Kurdê ke qeraxê Çemê Firatî de ameyî têhet pîrozbayî pê ardî.

 

2007: Weşîya to weşîya ma ya

 

Rayîr ra şîyayîşê 2007ine bi sloganê, "Weşîya to weşîya ma ya" ame organîzekerdiş. Bi mîlyonan kurd û bi 10 hezaran kesî verê xo dabî Amara û waştî ke heyetêk xoser şêro Îmraliyî. Pêwa astengîyan welatijan xo resna Amara.

 

2008: Alîgor de hewayê festîvale

 

2008ine de zî sere de Kurdistan û xeylêk bajarê Tirkîya bi des hezaran kesî taxa Alîgorê Pirsûsî de ameyî têhet. Taybetîya na serre a bî ke bi hewayê festîvale derbaz biba. 3yê Nîsane de şewe ra heta serê sibayî deyîrî ameyî vatiş, govende ameye kerdiş û rojbîyayîşê Abdullah Ocalanî ameye pîrozkerdiş.

 

2009: Azadîya ey azadîya ma ya

 

2009ine de zî bi sloganê "Azadîya to azadîya ma ya" rayîr ra şîyayîşê ver bi Amara pê ame. Şarî reyna Alîgor de ameyî têhet û seba Ocalanî darî dayî ro. Demo ke şar ver bi Amara kewt rayîr polîsan hêriş kerd, bi seyan kesî birîndar bî û wendekarê unîversîteyê Dîcleyî Mahsum Karaoglan û ciwano Pirsûs ra Mustafa Dag ameyî qetilkerdiş.

 

2010: Bîyayîşê to bîyayîşê ma yo

 

Rayîr ra şîyayîşê 2010ine bi sloganê "Bîyayîşê to bîyayîşê ma yo, azadîya to azadîya ma ya" pê ame. Tewrbîyayîş goreyê serranê bînan zêdeyêr bi. Welatijan xo resna dewe, hezaran kesî pîrozbayî pê ard.

 

2011: Na rey Xelfetî de bî

 

Bi des hezaran kesî na rey Xelfetî de bî. Reyna pêro astengîyan bi hewayê festîvale ame pîrozkerdiş.

 

2012: Adres Alîgor bi

 

Vernîya rayîr ra şîyayîşê Amara AKPyî sey ke OHAL îlan bikero tedbîr girewtibi. Rojêke verê 4ê Nîsane bi hezaran kesî kewtî rayîrê  Amara. Pêro dekewtiş û vejîyayîşê Rihayî ameyî padayîş. 30 km nêzdîyê Xelfetî nûqtayê kontrolî ame awankerdiş. Pêwa nê şar Alîgor de ame têhet û pîroz kerdî.

 

2013: Bi se hezaran rayîrê Amarayî de bî

 

2013ine dimayê mesajê tarîxî yê Newroza Amedî bi se hezaran kesî verê xo seba rojbîyayîşê Abdullah Ocalanî dayî Amara. Pîrozbayî sey festîvale derbaz bî.

 

2014: Abdullah Ocalanî ra mesaj

 

2014ine de Abdullah Ocalanî mesajêk Îmraliyî ra şirawit. Mesaj wina yo: "Birêz şarê kurdî, ez pêro hemrayanê xo, ciwanan, cinîyan ke seba rojbîyayîşê mi ke sey bîyayîşê newe ra yeno manakerdiş, kewtê rayîr silam kena. Bi têkoşînêk qerar ma ameyê sewîyeyêka îdarekarîyê xoser. Na cografya baxçeyê zaf kulturî, zaf bawerî, zaf nasnameyî bî. Pêro şarê Rojhelatî bi qirkerdişê  netewdeletan reyde ameyê rî bi rî. Seba nê zî ameyo famkerdiş ke rejîmê kanî û îdeolojîyê înan serê nê herran de nêeşkenê bêrê ciwîyayîş. Awanbîyayîşê komelê azad bi averberdişê îdarekarîyê xoser yê demokratîkî mumkin o. Ez ewro bi hawayêk fîzîkî mîyanê şima de nîya. Ez ewro şima reyde Amara de serê sofreyê rojî ke ameyo awankerdişî de ya. Ez yew bi yew mîyanê hemrayanê xo de ya. Ez sere de pêro cinî û ciwanan heme şarê ma emanetê hişmendîya azad kena. Şima pêrûne kena verike xo."

 

2015: 4 hetî ra rayîr ra şîyayîş

 

2015ine de bi waştişê, "Ocalan rê azadî" rayîr ra şîyayîşî ameyî kerdiş. Riha, Semsur, Dîlok û Amed de bi pêroyî çar het ra ver bi Amara rayîr ra şîyayîş ame kerdiş.

 

2016: Ame waştiş ke tecrîd peynî bibo

 

2016ine de zî rayîr ra şîyayîşo ke ame organîzekerdiş de şarî wat tecrîdê serê Rayberê PKKyî Abdullah Ocalanî peynî bibo.

 

2017:  Astengî nêameyî naskerdiş

 

Kongreya Komela Demokratîk (KCD), Tevgerê Cinîyanê Azadan (TJA), Partîya Herêmê Demokratîk (DBP) û Partiya Demokratîke ya Şaran (HDP) rayîr ra şîyayîşê 2017ine rê rayberî kerd û pêwa pêro astengîyan rayîr ra şîyayîş ame kerdiş.

 

2018: Ancî qedexe

 

2018ine de zî qerarê qedexeyî amebi girewtiş. Seranserê bajarî de hewl dayî ke vernîya şarî padê. Keyeyê ke Abdullah Ocalan ci de amebi dinya kerdibî ablûqa. Kesî nêgirewtî Xelfetî. La pêwa qedexeyan şarî pîrozbayîya xo kerd.

 

2019: Grevê vêşanîye

 

2019ine de zî qedexe ame îlankerdiş û Amara ameye ablûqakerdiş. Pêro rayîrî ameyî padayîş. Nê ser de KCDyî veng da ke her ca de pîrozbayî bikerê. Şarî nê ser de her ca de 4ê Nîsane pîroz kerd. Ancî Hemsereka KCDyî Leyla Guven bi waştişê tecrîd bêro wedaritiş, grevê vêşanîye dabî destpêkerdiş û no grev pêro zîndanan de vila bi û mohrê xo da tarîx ro.

 

2020: Astengîyê pandemî

 

2020ine de zî seba vîrusê koronayî qedexe ame îlankerdiş û pêwa nê şarê ke seba şêro Amara kewtî rayîr û bi astengîyan reyde ameyî rî bi rî.

 

2021: Astengî nêameyî naskerdiş

 

2021î de zî heyetêk ke KCD, TJA, DBP û HDP pê ameyîne seba şêrê Îmraliyî kewtî rayîr. La reyke bîn astengî vetî. Pêwa pêro astengîyan dewe rojbîyayîş ameye pîrozkerdiş.

 

2022: Xeylêk bajaran de şitilî ameyî ronayîş

 

2022yîne de zî şar; Amed, Botan, Serhed, Çukurova û Marmarayî ra kewtî rayîr. Şar reyna ame astengkerdiş. Taxa Vahna ê kîşte Çemê Firatî de şitlî ameyî ronayîş. Komê ke astengî derbaz kerdebî dewe de pîrozbayî kerdî.