RIHA - Keyeyê Şenyaşar ke verê edlîyeyê Rihayî çalakîya xo ya Nobeta Edaletî dewam keno, serê hesabê xo yê medyaya dijîtale de nê mesajî pare kerd: "Seba cuyêka merdimayî ma edalet wazenê."

 

Merdim û pawitoxê Parlamenterê AKPyî yê Rihayî Îbrahîm Halîl Yildiz 14ê hezîrana 2018ine de qezaya Pirsûsî ya Rihayî de hêrişê keyeyê Şenyaşarî kerd. Netîceyê hêrişî de mêrde û di lajê Emîne Şenyaşare ameyî qetilkerdiş. Nê ser de Emîne Şenyaşar û lajê aye Ferît Şenyaşar  9ê Adara 2021ine de vernîya Edlîyeyê Rihayî de dest bi çalakîya Nobeta Edaletî kerdî. Çalakîya keyeyê Şenyaşarî roja 737ine de dewam kena.

 

Keyeyê Şenyaşarî keyeyê xo yê qezaya Pirsûsî ya Rihayî ra ame verê Edlîyeyê Rihayî û tîya pankartê ke ser de "Seba keyeyê Şenyaşarî edaletî” nuştêne daliqnayî û çalakîya xo domnayî. Keyeyê Şenyaşarî derheqê nobeta xo de serê hesabê xo yê medyaya dîjîtale de nê mesajî pare kerd: "Seba cuyêka merdimayî ma edalet wazenê, seba edaletî zî ma îdarekarîyêk adil wazenê. Êdî bes o."