STENBOL - Pêro cinîyê ke hedefê îqtîdarî de yê, nokteyê hemparî de yenê têhet. Cinîyan dîyar kerd ke Têgêrayîşê Cinîyanê Kurdan û têgêrayîşê femînistan ê Tirkîya pîya têkoşîn bikerê û vatî: “Ma ewro xelasîya cinîyan qisey bikerê, wextê şîdet û bêtêduştîya cinî ciwîyenê, yewbînan ra dûrî nîyê. Do hem têgêrayîşê cinîyê kurdî, hem zî yê femînîstî rayîrê xelisyayîşî de têhet de ca bigîrê û têkoşîn bikerê.”

 

Cinîyan derheqê têkoşînê hempar yê kenê de  JINNEWSî rê ercnayîş kerdî.

 

‘Ma do têgêrayîşê cinîyanê kurdan dir rayîr ra şêrê’

 

Temsîlkara Meclîsê Cinîyan ê TCDPyî avûkate Esîn Îzel Uysal da zanayîş ke têgêrayîşê cinîyê kurdî, ewnîyayîşêk zaf hetî hewêneno û wina vat: “Tecrubeyê cinîyanê kurdan muhîm o. Ma do bi têgêrayîşê cinîyanê kurdan û têgêrayîşê rêxistinê cinîyanê bînan reyde bikerê. Ma zanê ke xelisîya cinî bêro qiseykerdiş, no zî bi binpaykerdişê xo ser nîno. Şîdetê cinîyan ser o têduşt o. Seba nê zî ma rayîro ke şino xelasî, pîya bimûnê.”

 

‘Felsefeya jin jiyan azadî’

 

Esîne dewam de bale ant felsefeya ‘jin jiyan azadî’ ser o ke bi serkêşîya cinîyan dinya de veng daya û wina vat: “Felsefeya jin jiyan azadî heto bîn ra dinya de vejîyena vernîya ma. Na netîceya tecrube û nêzdîbîyayîşê têgêrayîşê cinîyan kurdan de vejîya werte.”

 

‘Ma cinî do destur nêdê nê’

 

Aktîvîsta TJAyî Xecê Başkalane zî wina vat: “Tirkîya de seba tedayê îqtîdarî pê anê, cinî û tutî yenê qetilkerdiş. Hem têgêrayîşê cinîyê kurdî, hem zî têgêrayîşê femînîstî yê Tirkîya hemverê caardişê îqtîdar keno, do bi têkoşînê hempar wayîrê nasnameyê cinî vejîyo. Ma noktaya hempar de yenê têhet. Xebate û têkoşînê cinîyê kurdî pêro dinya de vila bîyo. Felsefeya Jin Jiyan Azadî pêro dinya de bîyo sey felsefe. Nika seba cinîyan dem demê azadîye yo. Semedo ke cinî hêzê xoverdayîşî yê xurtî yê.”

 

Muhîmîyê têkoşîn û paştdayîşî

 

Femînîst Oznur zî wina vat: “Verê mi zehmetî antêne. La dimayê ke mi rêxistinê cinîyan nas kerd, mi muhîmîyê têkoşîn û paştdayîşî dî. Ganî cinîyê ciwanî her raşteyî de bi hawayêkê azad paştdayîş pîl bikerê û xo bipawê. Her cayî de embazê min yê cinîyê kurdî est ê. Ma ameyî têhet û têkoşîn kenê. Ganî cinîyê kurdî û femînîstî nokteya hempar ê têkoşînî de bêrê têhet. Têkoşînê hempar ê cinîyan muhîm o. Ma eşkenê bi no hawa tedayê pederşahî yê komelî ser o bişikinê.”