AMED - Mûsa Anter 32yîne serrgêra qetilkerdişê xo de ame yadkerdiş. Yadkerdiş de dîyar kerdî ke do Çapemenîya Azade tu wext sere nêtewêno.

 

Rojnameger û nuştox Mûsa Anter (Apê Mûsa) 20ê êlule 1992 de Kuçeyê Hûmara 442 yê Taxa Cumhuriyetî ya qezaya Bajarê Neweyî yê Amedî de ame qetilkerdiş. Seba serrgêra 32yîne ê qetilkerdişê Apê Mûsa, bi serkêşîya Komeleya Rojnamegeran ê Dîcle Firatî (DFG) û Komeleya Rojnamegeranê Cinîyan ê Mezopotamyaye (MKG) cayo ke ci de amebi qetilkerdiş merasîmê yadkerdişî ame organîzekerdiş. Pêwa lajê Mûsa Anterî, Dîcle Anterî xeylêk rojnameger û sîyasetmedarî zî beşdarê yadkerdişî bîyî. Yadkerdişî de fotografê Apê Mûsa ameyî berzkerdiş. 

 

Hemsereka DFGyî Dîcle Muftuoglû yadkerdişî de qisey kerd û vat: “Faîlî nêameyî cezakerdiş. Kiştoxî hetê kesê ewro îktîdarî ra ameyî pawitiş. Îqtîdaro ke ewro zî bî şirîkê nê qirkerdişî û sûcdaran pawit. Na cografya de qirkerdiş yeno kerdiş û rastîyêk est o ke kurdan rê qirkerdiş yeno ferzkerdiş. Seba xebera dinya na rastî ra çinîbo, Apê Mûsa ame qetilkerdiş. Badê cû zî bi desan rojnamegerî ameyî qetilkerdiş, ameyî tepiştiş û rojnameyî ameyî bombavarankerdiş. Ewro zî bi qetilkerdişê Nagihan Akarsel, Gulistan Tara û ûsn. dewam kenê. Rojnamegerê kurdî zî nê rastîyan, rastîya şarî nûsenê û do binûsê zî. Hemrayê Apê Mûsa nê têkoşînî dewam kerdî. Çapemenîya Azade serê nêtewêna û do nêtewêno.”