Memîhan Zeydan

 

WAN - Sereka Komeleya Cinîyan a Starî avûkate Zeynep Demîr derheqê îşkence û destbendkerdişê protestoyê qeyûmî de pê ameyî de qisey kerd û vat: “Şîdet bi destê hêzê asayîşî yeno meşrûkerdiş. Sebebê şîdetê cinîyan ser o polîtîkayê bêcezaverdayîşî yê. Ma do heta peynî raqîbkerdoxê babete bibê.”

 

15ê Sibate de qeyûm tayînê şaredarîya bajarê pîlî ya Wanî ame kerdiş û badê tayînkerdişî kesê ke şaredarî de bî, bi îşkence ameyî destbendkerdiş. Operasyonê dimayê destbendkerdişan de raporan de vejîya ke kesî bi kuyayîş ameyê destbendkerdiş û îşkencekerdiş. Bi taybetî parlamenterê cinî şîdetî dir ameyî rî bi rî. 400 kesê ke amebî destbendkerdiş raporê kuyayîşî girewtibî. Bi desan kesî zî amebî tepiştiş.

 

Sereka Komeleya Cinîyan a Starî avûkate Zeynep Demîr, îşkence û destbendkerdişê ke ameyê ciwîyayîş ercna û da zanayîş ke şîdetê cinîyan ser o  bi destê hêzê asayîşî yenê meşrûkerdiş.

 

‘Îşkenceyêk polîtîk ê bi zanebîyayîş est o’

 

Zeynep Demîr derheqê îşkenceyî de wina qal kerd: “No metodo ke yeno caardiş, şîdetê cinîyan ser bi destê hêzê asayîşî yeno kerdiş û meşrûkerdiş. Tewr peyîn 10ê sibate de mudaxeleyê rayîrşîyayîşê ke cinîyan semedê waştişê aştîye organîze bikerê ame kerdiş û îşkenceyê giran cinîyan rê kerdî. Cinîyê ke mîyanê înan de nêweşê kanserî û epîlepsî zî bî, estbî. Îşkenceyê cinîyan ser o dewam kerd, badê demêk derg sewqê nêweşxane kerdî. Badê muayeneyan raporê doktoran de tacîz est o û badê hetê avûkatan ra derheqê îşkenceyî de muracatê sûcî ameyî kerdiş. Na mana de nika Wan de prosesêk îşkenceyê bi hişmendîya siyasî cinîyan rê yeno kerdiş.” 

 

‘Ma do prosesê huqûqî dewam bikerê’

 

Zeynep Demîr dîyar kerd cinîyanê kurdan hemverê xespkerdişê îradeyî de îradeyê xo yê demokratîkî şuxilnayê û vat: “34ine madeyê desturê bingehîn de heqê rayîrşîyayîş û kombîyayîşê welatijan qal beno.  La Wan de huqûq pê nêameyo. Bi pêroyî prosesêk bêhuqûqî ameyo kerdiş. Hemverê tutan, cinî û kal û pîran prosesê îşkence û derbkerdişî ameyo kerdiş. Nê hetî ra bêşik ma do prosesê huqûqî bidê dewamkerdiş. Ma do muracatê sûcî bikerê. Ma do nê îşkenceyî berê heta Dadgeha Destura Bingehîn (DDB) û Dadgeha Heqê Merdiman ê Ewropayî (DMME).”

 

'Bi destê hêzê asayîşî şîdet yeno meşrûkerdiş’

 

Zeynep Demîr dewam de bale ant şîdetê  parlamenterê cinîyan ser û wina vat: “Ma vînenê ke no şîdet heta parlamenteranê cinîyan zî şîyo û no bi destê hêzê asayîşî yeno meşrûkerdiş. Ma do hemverê nê bêhuqûqî bê. Ma do taqîbkerdoxê prosesî bibê. Sebebo tewr pîl ê zêdebîyayîşê şîdetê, bêcezamendiş o. Şîdetê cinîyan ser o resayo sewîyeyêka xidar. 400 kesê ke ameyî destbendkerdiş, pêrûne rapor girewt û vejîya werte ke  îşkence vînayê. Semedê prosesê winasî bêceza yenê verdayîş, şîdet zî zêde beno.”

 

Zeynep Demîr tewr peyîn vat, sey rêxistinê huqûqî û Komeleya Cinîyan a STARî do heta peynî taqîbkerdoxê prosesî bê û do fek têkoşînê huqûqî ra vera nêdê.