AMED - MKG'yî eşkerayîya xo de dîyar kerd ke komelo azad, bêçapemenîya azad mumkin nîyo û wina vat: "8ê Adare de ma venga pêro cinîyan kenê ke pêgirewtişî pîl bikerê û bibê vengê rojnamegeran. Ma do pîya têkoşînê xo yê semedê dinyayêke têduştî û azad dewam bikerê!"

 

Komeleya Rojnamegeranê Cinîyan ê Mezopotamyaye (MKG) bi munasebetê 8ê Adare Roja Cinîyanê Dinya eşkerayîya nuşteyî pare kerd.  MKG'yî eşkerayîya xo de neql kerd ke 10 cinîyê rojnamegerî semedê raştîyê ke nuştê, zîndanan de yê û vat: "Vengê înan vengê ma yo. Ma do hem zerre de, hem zî teber de pêgirewtişî xurt bikerê û raştîya vajê."

 

MKG'yî dewamê eşkerayîya xo de wina vat:"

 

Çapemenîya Azad, Cinîya Azad!

 

Ma ewro 8ê Adare Roja Cinîyanê Dinya ke sembolê têkoşînê têduştî, azadî û edaletî yê dinya ya, silam kenê.

 

Herra qedîmî yê Mezopotamyaye ser o, cinîyan bi têkoşînê xo yê tarîxî komelî vurnayê û bîyê vengê xoverdayîş û hêvîye. 

Ma sey Komeleya Rojnamegeranê Cinîyan ê Mezopotamyaye hemverê zext, sansûr, şîdet û cîyayîya rojnamegeran ser o têkoşîn kenê û têkoşînê xo dewam bikerê. Ma bi qeleme, kamera û vengê xo heqîqet taqîb kenê. Nê dir ma do heqê cuye, kede, xoverdayîş û waştişê cinîyan bidê çiman ver.

 

Rojnamegerî wexto ke karê xo kenê, înan rê tehdîdî yenê kerdiş, sansurî dir rî bi rî manenê, bêkar yenê verdayîş û şîdet vînenê. Labelê, ma zanê ke raştî bêveng nêmanena! Sey rojnamegerî pêwa zextan zî ma do pîya bihêz bibê, paştdayîş bidê yewbînan û raştîyan vajê.

 

Ewro 10 hevalê ma yê rojnamegerî semedo ke raştîyê ke nuştê zîndan de yê. Labelê, ma zanê ke ê do nêeşkê raştî esîr bigîrê! Vengê înan vengê ma yo. Ma do hem zere de û hem zî teber de bi pêgirewtişî xurt bibê û raştîya vajê.

 

Komelo azad bê çapemenîya azad mumkin nîyo!

 

8ê Adare de ma venga pêro cinîyan danê ke pêgirewtişî pîl bikerê û bibê vengê rojnamegeran. Ma do pîya têkoşînê xo yê semedê dinyayêke têduştî û azadî dewam bikerê!

 

Biciwîyo têkoşînê cinîyan! Biciwîyo çapemenîya azad! "