QERS- Parlamentera DEM Partîye ya Agirî Nejla Demîr derheqê tayînkerdişê qeyûman de qisey kerd û vat: “Sey waştêne nêeşkayî komelî bipelçiqnê. Nê semedî ra zî şar hemverê vê nê de îtîrazanê xo keno û hemverê xespkerdişê îradeyî bi xoverdayîşî vengê xo danê eşnawitiş.”

 

No hîrê demî îqtîdar qeyûman tayînê şaredarîyan keno. Tewr peyîn 15ê sibate de qeyûm tayînê şaredarîya Bajarê Pîlî ya Wanî û badê ci zî 20ê sibate de 6 serrî û 3 aşmî ceza hemşaredarê Qaxizmanî Mehmet Alkan rê birnayî û badê qeyûm ame tayînkerdiş. 

 

Parlamentera Partîya Têduştî û Demokrasî (DEM Partî) ya Agirî Nejla Demîr derheqê qeyûman de qisey kerd.

 

‘Tarîx de zî nimûneyê qeyûman est o’

 

Nejla Demîr dîyar kerd ke polîtîkayê qeyûmî yê cografyaya kurdan de yenê kerdiş, hewldayîşê xespkerdişê îradeyê şarî yo û vat: “Eynî wextî de hewldayîşêk xayînî yo. Hîrê demî yo qeyûman tayînê îradeyê şarî kenê. La tarîx de xeylêk nimûneyê ci est ê.”

 

‘Ewilî hêrişê destkewtişê cinîyan kerdî’

 

Nejla Demîr vat, wextê Suleyman Soylu de ameyê kerdiş û vat: “Suleyman Soylu hemverê kurdan de hewldayîş û planê xespkerdişî kerd. Îfadeyêk ci yê derheqê nê de est bî. Wexto ke Erdoganî vat, ‘qeyûman bikerê dewre’ eyî bi keyf nê çî pêşwazî kerd. Demê eyî de qeyûmê ewilî ameyî tayînkerdiş. Senî ameyî zî vernê de hêrişê destkewtişê cinîyan kerdî. No hîrê demî yo yewin çîyê ke qeyûman nêvurnayo, hêrişê hemverê destkewtişê cinîyan o. La her ke cinî, ciwanî benê wayîrê hişmendî, kursîya îqtîdarî kewena tehluke.”

 

‘Neaşkayî komelî bipelçiqnê’

 

Nejla Demîr tewr peyîn wina vat: “Bi polîtîkayê dewlete rî bi rî ameyî, belkî semedê demêk zextî şarî ser viraşt û tay peyser antî. La badê şarî bi hawayêk xurt nêrazîbîyayîşê xo mojna. Şar pê hesîya ke hukmat bi temamî bi ling û pelçiqnayîşê şarî, hewl dano bîyayîşê xo qetî bikero. No ayabîyayîşê şarî zaf muhîm o. No ayabîyayîş bi cinîyan û têkoşînê înan ê azadîye pê ame. Nê dir têkoşînê azadîye de tu kesî vengê xo nêbirna. Seke waştêne nêeşkayîne komelî bitepisnê. Nê semedî ra şar na nuqta de îtîrazê xo de israr keno û cayo ke îradeyê înan ameyo desteserkerdiş, eşkeno bi xoverdayîşê xo vengê xo bido eşnawitiş.”