AMED - Cinîyan dîyar kerdî ke badê vengdayîşê ‘aştî û komelê demokratîk’ yê Rayberê PKK’yî Abdullah Ocalanî berpirsyarîyêk pîl keweno milê înan ser. Cinîyan dîyar kerd ke vengdayîş zaf muhîm o û do tesîr pêro şarê dinya rê bikero.

 

Badê vengdayîşê ‘aştî û komela demokratîke’ Rayberê PKK’yî Abdullah Ocalanî ke 27ê Sibate de ame deklerekerdiş dima pêro hetan paştdayîş dayî û bi coş pêşwazî kerdî. Cinîyê Amedî derheqê vengdayîşî de qisey kerdî û dîyar kerdî ke semedê berpirsyarîyê xo dest bi xebatan kerdê.

 

‘Ganî proses baş bêro taqîbkerdiş û ercnayîş’

 

Hemsereka DBP’yî Amedî Sultan Yaray bale ant serê mesajê Rayberê PKK’yî Abdullah Ocalanî û vat: “Mesaj zaf muhîm o. La her kes ganî baş fam bikero. Komelî de mesaj baş nêameyo famkerdiş. Vanê peynîya têkoşînî ameya. La ganî proses baş bêro taqîbkerdiş û ercnayîş. Wexto ke ma ewnîyenê mesaj ra vînenê ke çareserîya xeylêk meseleyan mojnayê. Ganî proses baş bêro taqîbkerdiş. Ganî azadîya Birêz Ocalanî pê bêro.”

 

‘Ma semedê famkerdişê prosesî çapemenîya azad taqîb bikerê’

 

Sultan Yaray tewr peyîn wina vat: “Semedo ke proses baş şêro, ganî ma çapemenîya azade taqîb bikerê. No mesaj ma pêrûne hîsgêr kerd. Bi mîlyonan kes Abdullah Ocalanî sey îradeyê xo vîneno. Nê semedî ra zî badê serran ameyîşê mesajî ma hîsgêr kerd. Ganî ma bi ruhê seferberî pey prosesî de bê. Ganî ma çapemenîya xo taqîb bikerê. Ma vanê ma kurdî semedê aştî amade yê. Kurdan rê zaf zêde zulm ame kerdiş. Birêz Ocalanî rayîr da vernîya ma. Ma bi ruhê seferberî wayîrê ci vejîyê.”

 

‘Aştî ferz a’

 

Aktîvîsta TJA’yî Hasîbe Yazdik zî dîyar kerd ke PKK’yî bi serran semedê aştî û demokrasî têkoşîn dayo û vat: “PKK sey serekî zî vato, semedê xeylêk sebeban hemverê nêheqî û bêhuqûqî vejîya werte. Nê semedî ra têkoşînê xo dewam kerdêne. Serekî xora bi serran bî vatêne, ez aştîye eşkena bîyarî, ganî no proses açaryo aştîye. La çi heyf cewabê xo nêgirewt. Aştî ferz a. PKK bi raştî têgêrayîşê şarî bî. Nê semedî ra zî hêzê xo şarî ra girewtêne. Nê semedî ra şar zaf girêdayeyê têgêrayîşî yo. Semedê kesê PKK awan kerdêne tutê nê şarî yê.”

 

Badê vengdayîşî taxan de xebate

 

Hasîbe Yazdik dewam de wina vat: “Do şar her tim paştdayîş bido prosesî. Ma do taxan de bê. Bi kombîyayîşê şarî vengdayîşo ke ameyo kerdiş şarî ra vacê. Prosesê 8ê Adare, Newroze vernîya ma de ya.  Xebatê ma dewam kenê. Semedê her persê şarî cewabêk ma est o. Ma do xebatanê xo dewam bikerê.”