Derya Ren

 

RIHA - Fermandara YPJyî Avînar Dêrik derheqê şorişê Rojawanî, 8ê Adare û artêşbîyayîşê cinîyan ê Vakur  û Rojhelatê Sûrîye ercna û vat: “Rayber Apo vano; ‘Tena rojêke dîyarîya semedê cinîyan yena manaya înkarê kede û xoverdayîşê cinî’. Nê semedî ra zî ma tena rojêke nê pêro rojan dîyarîya cinîyan bikerê û semedê nê têkoşîn bikerê.”

 

Rojhelatê Mîyanên û pêro dinya de têkoşînê cinîyan her ke şino pîl beno û bi serkêşîya cinîyan destkewtişî benê. 2012ine de badê xoverdayîş Sûrîye de dest pêkerd, dest bi awankerdişê Şorişê Rojawanî ame kerdiş û cinîyan wareyê leşkerî, ekonomî, sîyasî û komelî de xeylêk destkewtişî bi dest kerdî. Netîceya nê destkewtişan de cinîyê kurdî bi perspektîfê Rayberê Şarê Kurdî Abdullah Ocalanî Yewîneya Pawitişê Cinîyan (YPJ) 4ê Nîsana 2013ine de awan kerd. Binê banê YPJyî de tabûrê cinîyan ê yewine bi nameyê Şehîd Rûken qezaya Cindirêsî ya Efrînî de ame awankerdiş. Badê tabûrê cinîyanê Şehîd Edaletî ê Qamişlo û Şehîd Dîcle yê Kobanê ame awankerdiş.

 

YPJ roja ke ameya awankerdiş cepheyê vernî de hemverê hêrişan têkoşîn kena

 

Fermandara YPJyî Avînar Dêrîk derheqê  şorişê Rojawanî, 8ê Adare û artêşbîyayîşê cinîyan ê Vakûr û Rojhelatê Sûrîye ser o ercnayîş kerd.

 

Rastîyê xoverdayîşî

 

Avînar Dêrik vat, pêro cinîyê xoverdayoxî yê dinya 8ê Adare pîroz kenê û wina vat: “Ma Rayber Apo û şehîdanê xo ra vanê pîroz bo. Bi na wesîla ma şehîdan yad kenê. Vernîya Şorişê Rojawanî cinî çin ameyîne hesibnayîş. Ewro rastîyêk bi YPJyî dewam kena, est a. Rastîya her cinîyêke de rastîya komelî est a. Ewro Rojawan de prosesêk şorişî yeno ciwîyayîş. La no şoriş wina xo bi xo awan nêbî. Bi hezaran serkêşî cinî yê şorişî est ê. Mîrasê şorişî est o. Besê, Zarîfe, Sara..”

 

Rastîya tarîxî

 

Avînar Dêrik wina dewam kerd: “Vernîya şorişî cinî her wareyî de çinî bî. Cinî her tim probleman ser o şî û têkoşîn dayî. Rastîyêk tarîxî ke Rayber Apo pêşkêşê cinîyan kerdo est o. Nê rastî dir cinîyan xo newe ra bîyaye kerdo. 2012ine de bi serkêşîya cinîyan kewtî prosesêk şorişî. 4ê Nîsana 2023ine de YPJ ame awankerdiş. YPJ hem hetê çekdarî û hem hetê îdeolojîkî de hêzê pawitişê cinî yo.”

 

Têkoşînê cinîyan ê hemverê DAIŞî

 

Avînar Dêrik dîyar kerd ke têkoşînê YPJ dano hemverê zîhnîyetê camêrd û şerê tarî yo û vat: “Sîstemê serdest ê camêrdî cinîyan çin hesibneno DAIŞî dir hîn zêde şênber bîyo. Cinîyê Rojawanî hemverê DAIŞî, hemverê sîstemê serdestî yê camêrdîye xo ver dayê û hema zî danê.”

 

Tesîrê şorişê Rojawanî

 

Avînar Dêrik dewam de wina vat: “Cinîyan, bi coş, moral, cesaret, bawerî û heskerdişêk pîl cepheyê şerî de, pêro wareyan de rolêke pîl kay kerdî. Destpêkê şorişê Rojawanî ra heta nika xeylêk bedelî ameyî dayîş û bi xêrê nê bedelan xeylêk destkewtişî ameyî bidestkerdiş. Ma do 8ê Adara 2024ine ra nata bi xoverdayîşê destanî yê cinîyan 8ê Adare pêşwazî bikerê. Berpirsîyarîyê ma zî zêdeyêr ê. Semedo ke hîn hevalê ma yê cephe de şer kenê, est ê. Rayber Apo eynî wextî de vano, 'dayîşê rojêke cinîyan dir înkarkerdişê xoverdayîş û keda cinî yo.' Nê semedî ra ma do têkoşîn bikerê ke emser pêro rojê xo dîyarîya cinîyan bikerê. Ma do berpirsyarîyê xo bi ca bîyarê.”

 

Muhîmîyê tecrubeyê ke ameyê bidestkerdiş

 

Avînar Dêrik wina peynî ard: “Xoverdayîşê peyîn yê Awbendê Şehîdan (Bendava Tişrîn), Qereqozax û Dêrhafirî de cinîyan tena wareyê leşkerî de nê, pêro wareyê komelî de berpirsyarîyêk pîl û tarîxî girewtî xo ser. Xoverdayîşê Tişrînî de 7ine ra heta 70 serre her kesî xo ver da. Tutan ra bigî heta kal û pîran xeylêk kesî dinyaya xo bedelnayî. Ma do bi xoverdayîş û helwestê xo têkoşînê xo yê semedê demokratîkbîyayîşê Sûrîyeya neweyî dewam bikerê. Ma do xoverdayîşê xo dewam bikerê ke tecrubeyê Vakur û Rojhelatê Sûrîye bi dest kerdê û semedê cinîyanê Sûriye û temamê dinya bibê nimûne.”