AMED - Netîcenameyê kombîyayîşê hemserekê DBP’yî yê bajarî û PM’yî de ame vatiş ke semedê çareserî ganî dewlete û îqtîdar tewr zelal bê û gamê somutî bierzê.  

 

PM’yê DBP’yî, peynîya vengdayîşê Rayberê Şarê Kurd Abdullah Ocalanî bi rayberîya hemserekan Çîgdem Kiliçgun Uçar û Keskîn Bayindir kombîyayîşê xo yê PM û hemserekê şaristanan bi sernameyê “Vengdayîşê Birêz Ocalanî û çareserîya demokratîkî ya problemê kurdî” viraşt.

 

Netîcename de peynîya munaqeşeyan de nê tesbîtî ameyê kerdiş:

 

*”Vengdayîşê Birêz Ocalanî tena seba kurdan nê, seba heme şaran û demokratîkbîyayîşê Tirkîya mananeyêk xo de hewîneno. Ma sey DBP do seba pawitişê destkewteyê şarê xo, têkoşînê xo dewam bikerê.

 

*Înşakerdişê komeleyo demokratîk hedefêk nê, ganî sey şeklê cuyaye bêro hedefkerdene, seba tesîskerdişê adaletî şertêko bingeyî yo. 

 

*Wayîrvejyayîşê îradeya çareserî ya Birêz Ocalanî, tena verpirsîyarîyêka sîyasî nê, verpirsîyarêka ameyoxê şarê ma ya.

 

*Proseso ke Birêz Ocalan dayo destpêkerdene, ganî bêro komelkerdene, vengdayîşê Birêz Ocalanî eynî demî de waştişê hemkarîyê şaran o. Ganî her kes wayîrê nê prosesî bivejo.

 

*Ma na çarçewa de do 100 merkez de têameyişê şarî û kombîyayîşan bivirazê. Na çarçewa de ma do şarî rê malûmat bidê û parçeyê prosesî bikerê. Xususî 8ê Adare û 21ê Adare, waran de bi coş û kelecanî wayîrvejyayîşê prosesî ma do bimojnê.

 

*Ganî azadîya fizîkî ya Birêz Ocalanî bêro caardene, seba averşîyîşê prosesî şertêko avzel o.

 

*Ganî dewlete û hukmat do seba çareserîye nexşereya xo dîyar bikerê û gamê somutî bierzê. Bi lezûbez zemînê Meclîsî zî bêro pratîkkerdene, nê prosesî de STK, muxalefetî ra zî verpirsîyarî bêro dayene.”

 

‘Çîyo ke keweno milê ma ser ma do bikerê’

 

Badê tesbîtan wina ame vatiş: “Ma sey DBP, vengdayîşo tarîxî ra wayîr vejîyenê, no vengdayîş zî do bi şarê xo gird bikerê. Na pêvajo tena pêşnîyazê sîyasetî nê, îfadeya şênber a têkoşînê şaran a. Ma do seba aştî û çareserîye ser o her tim bixebitê.”