AMED - Wê îsal Newroz bi dirûşma "Em ê bi agirê Newrozê li ber xwe bidin û bi ser kevin" bê pîrozkirin. Neworoza 2021'ê ku li bendê ye bi coş bê pîrozkirin strana wê jî dyar bû. 

 

Bernameya Newroza îsal, li Amedê hat parvekirin. Ji bo Newroza ku wê bi dirûşma "Em ê bi agirê Newrozê li ber xwe bidin û bi ser kevin" li 30 bajar û 61 navçeyan bê pîrozkirin, danasîna strana ku ji bo Newrozê hatiye gotin û klîba wê jî hat çêkirin. Gotinên stranê yên Mihemedê Pirosî ne. Hunermend Dîlan Yîgît, Jiyan Savci, Cejna Sarûhan, Kadîr Çat, Ûmût Botan, Mûrat Bakrak, Devrîm Ozluk, Mêrxas Viyan û Merve Admîş distrên. 

 

Gotinên strana "Dîsa li Newroza" wiha ye:

 

"Bipirsin ji dilê dîrokê

Ji demsalan ji şev û rokê

Ji hespê xwîn giha çokê

Da rastiyê danê ser kokê

 

Newroz neyara tariyê ye

Tîra ser singa şevê ye

Bo zalim hesta revê ye

Soza li ser eniyê ye

 

Sed caran mizgînî, dîsa ducanî ye xweza

Nifşê Rustemê Mezin li vê axê nû za

Bi şîrê xwe mêjand Hurema maka Zagrosa

Vînek ji agir gur bû dîsa li Newroza

 

Hatin Kawayê her demê

Pêlek ji bayê serdemê

Weke Sûr û Dimdimê

Ketin govend û semê

 

Zivirî ew çerxa felek

Wek hezar salan carek

Dem dema ceng û tolek

Kurd li dor Rojê bûn xelek

 

Sed caran mizgînî, dîsa ducanî ye xweza

Nifşê Rustemê Mezin li vê axê nû za

Bi şîrê xwe mêjand Hurema maka Zagrosa

Vînek ji agir gur bû dîsa li Newroza"