NAVENDA NÛÇEYAN - Fîlma "Nameyên ji Şengalê" dê di 13’yê mijdarê de, di 7’emîn salvegera rizgarkirina Şengalê de were pêşandan. Fîlm çanda berxwedêr a dayikan, êş û rizgarbûna Şengalê vedibêje.

 

Fîlma bi navê ‘Nameyên ji Şengalê ku ji aliyê Produksiyona Nûjiyan ve hatiye çêkirin û derhêneriya wê ji aliyê Dersîm Zêrevan ve hatiye kirin, derdikeve pêşberî temaşevanan. Amadekariya filîmê ji 2018’an ve destpêkiriye û wê di dîroka rizgarkirina Şengalê di 13’yê Mijdarê de bê pêşandan. 

 

Fîlma Nameyên ji Şengalê him fikir, him drama, him jî belgefilîm di hundirê xwe dihewîne. Her wiha êş û azarên ku di Şengalê de hatiye jiyîn, rizgarvanên civaka Şengalê, şervanên azadiyê û dayikên ku hêviya serkeftinê di dilê xwe de dihewîne di fîlmê de derdikeve pêşberî temaşevanan. Di rola heyî de şervanên azadiyê bi ruhê serkeftinê tevlî hemû pêngavên rizgarkirinê dibin û bi rizgarkirina Şengalê re hêviya civaka êzidî car din nûjen dikin. Fîlm ji 6 beşan pêk tê û di her beşê de nameyek nîşan dide. Kesên ku ferman, berxwedanî û koçberî di dema fermanê de jiyan kirine wek lîstikvan di fîlm de rol lîstîne. Fîlm ji çîrokên bûyerên rast hatiye çêkirin.

 

Di fîlm de ji kesên ku nûnertiya dayikên berxwedêr dike Şemê Remo ye.

 

Berxwedan û keda jinê

 

Şemê Remo ku jinekî bi berxwedêrî û îradeya xwe naskiriye û di fîlm de rolekî sereke lîstiye ji me re qala çêkirina fîlm kir û diyar kir ku ew wek lîstikvan di fîlm rol digire û got: “Min xwest bi tevlîbûna fîlm çanda dayikên berxwedêr ên ku civaka me îro li ser destê wan tê birêvebirin bidin pêş. Jinek çawa dikare li ber xwe bide, çanda xwe biparêze û pêşengiyê ji gelê xwe re bike me da diyarkirin. Berxwedanî, êş û azarên ku xelkê Şengalê jiyan kirine, me xwestiye di nava fîlm de ji cîhanê re raxin berçavan û her kes bibîne ku me bi kedekî çawa xwe gihandiya roja îro. Di dema fîlm de me hîs kir ku çawa dîrok li ser destê dayika di zivire berxwedanî û keda jinê.”

 

'Me kêliyên fermanê jiyan kir'

 

Şemê qala rola gerîlayên ku bi derbasbûna xwe ya li Şengalê hêviyên mezin di nava dilê civaka êzidî de avakirin û heta niha vê hêvî jiyan dikin jî vedibêje,“Me di demekî zehmet de dest bi çêkirina fîlm kir, lê me ferman çawa jiyan kir, çawa li ber xwe de û çawa ji aliyê gerîla ve hatine parastin me derxiste holê. Çawa gerîla bi torikê xwe ve hatin nan û av dan zarok û kalan, gelê me himbêz kirin û ji xeteriyê rizgarkirin, me xwest em ji cih û kesên ev yek nedîtine re jî vebêjin. Me kêliyên fermane jiyan kir.”

 

Şemê diyar kir ku ev cara yekemîne di fîlmekê de rol dilîze û wiha domand: “Me zehmetî nedit, ji ber ku heman tiştê di fîlm de me jiyankiribû û ji me re ne wek fîlm wek rastiya civaka me dihat. Di fîlm de tê xuyakirin, jinên Êzidî çawa ji koletiyê xilas bûn û gihîştin wê astê bersiva dijmin bidin.” (ROJNEWS)