NAVENDA NÛÇEYAN - Xelkên Qamişlo, Girkê Legê, Çilaxa, Til Koçer û Rimêlanê li dijî tecrîdê daketin qadan û peyama "Rêber Apo vîna me ye" da.

 

Partiya Yekitiya Demokratîk (PYD) bi armanca şermezarkirina pergala îşkence ya li hemberî Rêberê PKK'ê Abdullah Ocalan, li Qamişlo û Girkê Legê meş organîze kirin.

 

Qamişlo 

 

Bi pêşengiya PYD, li dijî pergala qirkirin û îşkenceyê ya li ser Abdullah Ocalan, li Qamişloyê meşeke girseyî hate lidarxistin. Endam û rêveberên PYD'ê, Rêveberiya Xweser, hemû sazî û dezgehên civaka sivîl, Kesayetên naskirî, rûspî û bi sedan şêniyên bajêr bi hemû pêkhateyên xwe tev li meşê bûn. Meşê li ser rêya Kornîş dest pê kir. Girseya meşê piştî ku gihîşt Qada Çerxerêya Cotkar, mîtîngek li dar ket.

 

 

Hevseroka TEV-DEM'ê Remziye Mihemed û endamê Desteya Rûspiyan a Bakur û Rojhilatê Sûryeyê Hiyal Xweyir li wir axivîn.

 

Remziye Mihemed îşaret bi hevdîtina bi Abdullah Ocalan re kir û got: “Rêber Apo silav ji bo me şandiye. Em li ser navê hemû gelên Bakur û Rojhilatê Sûryeyê ji Dêrik heya Heleb û Şehbayê berxwedana Rêber Apo silav dikin." Remziye Mihemed bal kişand ser peyamên Abdullah Ocalan û bi bîr xist ku Abdullah Ocalan destnîşan kiriye ku ger zemîneke guncaw bê avakirin ew amade ye pirsgirêkên dîrokî çareser bike. Remziye Mihemed da zanîn ku dewleta Tirk çi qasî tengav dibe, bi Abdullah Ocalan re dihêle ku hevdîtineke kurt çêbe.

 

Remziye Mihemed di dawiya axaftina xwe de bal kişand ser çalakiyên li dijî pergala îşkence û qirkirinê yên li Koln û herêma Bakur û Rojhilatê Sûryeyê û got: “Em bi hemû pêkhateyên herêmê wan çalakiya silav dikin. Em berxwedana gerîla ya ku xwe bi keda xwe mezin dike, silav dikin û heya azadiya fîzîkî ya Rêber Apo pêk were, em ê her kêlî li qadan bin.”

 

Endamê Desteya Rûspiyan a Bakur û Rojhilatê Sûriyeyê Hiyal Xweyir di axaftina xwe de da azîn ku piştî 43 meh ku pergala qirkirin û îşkenceyê li ser Rêber Abdullah Ocalan, destûr hat dayîn ku Omer Ocalan pê re hevdîtinê pêk bîne.

 

Hiyal Xweyir da zanîn ku Rêber Abdullah Ocalan ji Girava Îmraliyê ji bo wan peyam şandine û diyar kir ku ew xwedî hêza teorîk a pratîk e ku piştgiriyê bide pêvajoya siyasî û ji pevçûn û tundiyê veguherîne pêvajoyeke hiqûqî û siyasî. Hiyal Xweyir di dawiya axaftina xwe de got: “Em hîna jî di bin dagirkeriyê de ne û li vir em li ser navê we hemûyan peyama azadiya Rêber Apo didin. Azadiya Rêber Apo vîna me ye.”

 

Girkê Legê 

 

Meclisa PYD'yê ya Girkê Legê jî bi daxwaza azadiya fîzîkî ya Abdullah Ocalan meşek li dar xist. Bi hezaran şêniyên ji Girkê Legê, Rimêlan, Til Koçer, Çilaxa û nûnerên Rêveberiya Xweser û tevahî sazî beşdarî meşê bûn. Di meşa ji Çerxerêya Şehîd Xebat dest pê kiriye de pankartên "Serok Apo vîna me ye" hatin vekirin, wêneyên Abdullah Ocalan hatin hildan, her wiha dirûşmên "Bijî Serok Ap" û "Bijî berxwedana Îmraliyê" hatin berzkirin.

 

Meş li deriyê Rimêlanê veguherî mîtîngê. Hevseroka Meclisa bajarê Girkê Legê Nesrîn Dahir di mîtîngê de axivî û got: "Ji bo azadiya fîzîkî ya Rêber Abdullah Ocalan em careke din soz didin. Em ji vir heya Îmraliyê wî silav dikin." Nesrîn Dahir diyar kir ku dewleta Tirk ji ber ku aştiyê red dike roj bi roj pergala îşkence û qirkirinê li dijî Abdullah Ocalan girantir dike û wiha domand: "Heta azadiya fîzîkî ya Rêber Abdullah Ocalan bi dest bixin, dê têkoşîna xwe bidomînin."

 

Dûre endamê rêveber ê Meclisa PYD`ê ya Til Koçerê Meksem Sebah axivî û got: "Na ji zilmê re, na ji êrişan re, na ji qirkirina komî re. Erê ji aştiyê, biratiya gelan û neteweya demokratîk re."

 

Meksem Sebah wiha axaftina xwe domand: "Felsefeya Rêber Abdullah Ocalan mezin bû, heta bû dar. Em ê bi hev re bi vîna gelan û ramanên Rêber Abdullah Ocalan bi ser bixin." 

 

Piştî wê xwendekar Arif Ehmed li ser têkoşîn û azadiyê helbestek xwed.