DÊRSIM - Ji bo Sakîne Cansiz li Dêrsimê bernameya bi bîr anînê hat lidarxistin û di bernameyê de hat diyar kirin ku dê têkoşîna Sakîne Cansiz li her derê bidomînin. 

 

Ji damezirînerên PKK’ê Sakîne Cansiz (Sara), Endama Tevgera Ciwanên Kurd Leyla Şaylemez (Ronahî) û Nûnera Kongreya Neteweyî ya Kurdistanê (KNK) ya Parîsê Fîdan Dogan (Rojbîn), di 9’ê Çileya sala 2013’yan de li paytexta Fransayê Parîsê hatin qetilkirin. Sakîne Cansiz, di 12’yemîn salvegera qetilkirina xwe de li avahiya Rêxistina Partiya Wekhevî û Demokrasiyê ya Gelan (DEM Partî) ya li Dêrsimê hat bibîranîn. 

 

Berdevka Meclisa Jinan a Partiya Herêmên Demokratîk (DBP) Bêrîvan Bahçecî, parlamenterên DEM Partiyê Ayten Kordu û Gulcan Kaçmaz Sayyîgît, nûnerên partiyên siyasî û saziyan tev li bîranînê bûn. Di bîranînê de wêneyên jinên hatine qetilkirin hatin hilgirtin û sînevîzyon hate nîşandan. 

 

Têkoşîna li dijî zîhniyeta înkarê 

 

Parlamentera Dêrsimê Ayten Kordu di bîranînê de axivî, jinên hatin qetilkirin bi bîr anî. Ayten Kordu gotina Abdullah Ocalan a “Ev komkujiya Dêrsimê ya duyemîn e” bi bîr xist û wiha dest bi axaftina xwe kir: “Têkoşîna azadiyê ya hevala Sakîne xwedî cih û hewldaneke pir girîng e. Heval Sakîne di gihandina vê têkoşînê de gelek ked daye. Heval Sakîne digot 'Jiyana min tim şer bû'. Li dijî zîhniyeta ku Gelê Kurd înkar û tune dike têkoşîn kir. Bi tevayî canê xwe da. Têkoşîna her 6 hevalên me di têkoşîna azadiyê ya jinên Kurd de xwedî cihekî girîng e."

 

'Dê têkoşîna wê tu carî bi dawî nebe' 

 

Parlamentera Wanê Gulcan Kaçmaz Sayyîgît jî anî ziman ku têkoşîna jinan bi gotinan nayê ravekirin, hedefgirtina jinên kurd ên li navenda Parîsê konsepteke nû ketiye meriyetê û wiha bi lêv kir: “Ji wê demê ve li dijî jinên Kurd şerekî taybet tê meşandin. Hevalên me yên weke Hevrîn Xelef hatin qetilkirin." Gulcan Kaçmaz Sayyîgît bal kişand ser qetilkirina rojnameger Cîhan Bîlgîn û Nazim Daştan jî û wiha dawî li axaftina xwe anî: "Jinên Kurd bi felsefeya Jin, jiyan, azadî modelek ava kir û em têkoşîna xwe bi wê didomînin. Em li hemberî her hevrêyekî xwe bi rêzdarî serê xwe ditewînin, em ji hevalê xwe yê ku dibêje 'Jiyana min her tim şer bû' re soz didin ku ev têkoşîn wê tu carî bi dawî nebe." 

 

'Em alên hevalên xwe li erdê nahêlin'

  

Berdevka Meclîsa Jinan a DBP'ê Bêrîvan Bahçecî, diyar kir ku têkoşîna jinê li her qadê didome û wiha bi lêv kir: “Aqilê dewletê dixwaze pêşengiya jinan a li her qadê tune bike. Naxwaze jin xwe bi rêxistin bikin. Komkujiya hevalên me yên jin li Parîsê, li navenda Ewropayê berdewama vê zîhniyetê ye. Hevalên me yên weke Nagîhan Akarsel, Hêro Bahadîn, Gulîstan Tara jî bi taybet hatin hedefgirtin û qetilkirin. Ger em ewqas behsa têkoşîna jinan dikin û dibêjin 'Jin Jiyan Azadî' ev bi saya keda wan e. Em tu carî alên wan li erdê nahêlin. Em ê têkoşîna wan mezin bikin. Kes nikare dawî li vê têkoşînê bîne. Em hemû hevalên xwe yên di vê têkoşînê de jiyana xwe ji dest dane bi bîr tînin. Cîhan Bîlgîn jî di vê têkoşînê de jiyana xwe ji dest da, ji ber şerê qirêj ê li Rojava aşkera kir bû hedef û qetil kirin. Em ê tu carî dest ji têkoşîna wan bernedin. Em ê têkoşîna Sakîne Cansiz a ku got 'Jiyana min her tim şer bû' li her derê bidomînin." 

 

Piştî bîranînê dê gel biçin ser gora Sakîne Cansiz a li Goristana Asrî ya li navenda Dêrsimê.