NAVENDA NÛÇEYAN - 1'ê Gulanê li gelek bajaran bi çalakî, mîtîng û daxuyaniyan hat pîrozkirin û peyama têkoşîna hevpar hat dayîn.

 

Bi boneya 1'ê Gulanê Cejna Karkeran, li gelek bajaran mîtîng, daxuyanî, meş û çalakiyên cuda hatin lidarxistin.

 

Riha

 

Platforma Ked û Demokrasiyê ya Rihayê bi wesîleya 1'ê Gulanê Cejna Karkeran meş lidarxist û dû re daxuyanî da çapemeniyê. Girse beriya meşê li Parka Novada kom bû. Tevî pêkhateyên platformê, Partiya Wekhevî û Demokrasiyê ya Gelan (DEM Partî), Partiya Herêmên Demokratîk (DBP), Tevgera Jinên Azad (TJA), endamên Meclîsa Dayikên Aştiyê ya Rihayê, hevşaredarên Curnê Reş, Xelfetî, Pirsûs, Hewagê û gelek kesên din tevlî meşê bûn.

 

 

Colemêrg 

 

Bi pêşengiya Platforma Hêzên Ked û Demokrasiyê ya Colemêrgê li Qada Cîlo ya kevin a Geverê mîtîngek hat lidarxistin. Li qada mîtîngê pankartên “Em in, yên hilberîner in, li dijî pergala ku dikuje em bibin yek”, “Bijî 1’ê Gulanê”, “Ji buhabûnê, îstîsmar û feqîriyê re na” û “Em ê bi ked û xwêdana xwe bi ser bikevin” û alên pêkhateyên platformê hatin daliqandin. Di mîtîngê de peyama "Ev ferman teqez wê biguhere" hat dayîn.

 

Semsûr  

 

Li Semsûrê bi beşdariya rêxistinên TJA, DBP û DEM Partî, parlamenterên DEM Partiyê, Konfederasyona Sendîkayên Kedkarên Cemaweriyê (KESK), Odeya Tabîban a Semsûrê, Baroya Semsûrê, TMMOB, OHD, ÎHD, Ferat-Der û bi hezaran kesî meş hat lidarxistin û dûre jî ber bi qada mîtîngê ve çûn. 1'ê Gulanê bi coşek mezin hat pîrozkirin. 

 

 

Dîlok 

 

1'ê Gulanê Cejna Karker û Kedkaran li Dîlokê bi hevkariya DÎSK, TTB, KESK, TMMOB û Platforma Jinên Demokratîk a Dîlokê li Qada Îstasyonê hat pîrozkirin. Beşdar bi meşê gihiştin qadê. Pîrozbahiya bi coş li tevahiya meş û mîtînga ku di bin baranê de pêk hat dewam kir. Parlamentera Partiya DEM'ê ya Sêrtê Sebahat Erdogan Saritaş û Parlamentera Partiya Kedê (EMEP) Dîlokê Sevda Karaca, Rêxistinên DEM û DBP'ê yên bajar û navçeyên navçeyê, gelek partiyên siyasî, sendîka û rêxistinên civaka sivîl ên bajêr hatin qada ku wê mîtîng lê bê lidarxistin, bi dirûşmeyên "Bijî yek yek" û "Em ê bi berxwedanê Gulanê bi ser bikevin" meşiyan.

 

 

Kilis

 

Nûnerên KESK, Egîtîm Sen û Tûm Bel-Sen ên Kilîsê jî bi meş û daxuyaniya çapemeniyê 1'ê Gulanê pîroz kirin. Li ber Mizgefta Hacî Cumbûş a navçeya navendî ya bajêr kom bûn, endamên sendîka û welatî heta Qada Cumhuriyetê ya ku wê daxuyanî bê dayîn meşiyan. 3 xwendekarên lîseyê yên navên wan nehat hînbûn, ji ber ku di çenteyên xwe de Kovara Troçkîîst dîtin dema xwestin tevlî meşê bibin hatin binçavkirin. Xwendekar piştî ku "lêpirsîna Kovarê" temam bû serbest hatin berdan.

 

Enqere

 

Li Enqereyê 1'ê Gulanê bi pêşengiya Konfederasyona Sendîkayên Kedkarên Cemaweriyê (KESK), Konfederasyona Sendîkayên Karkerên Şoreşger (DÎSK), Yekîtiya Odeyên Endezyar û Mîmarên Tirk (TMMOB) û Odeya Tabîban (TMMOB) û Odeya Tabîban a Enqereyê li Qada Tandogan bi coş hat pîrozkirin. Di pîrozbahiyê de peyama domandina berxwedana hevpar hat dayîn.